Analisti politik Azem Vllasi ka shprehur zhgënjim të thellë për zhvillimet e fundit politike në Kosovë, duke i cilësuar ato si “maskarallëçe” dhe duke theksuar mungesën e vullnetit për t’i komentuar më tej. Ai ka theksuar se bota po habitet me situatën në vend, ndërsa Serbia po përfiton nga kjo gjendje. Kuvendi i Kosovës nuk ka përmbyllur konstituimin e nisur më 6 gusht, pasi kreu i Lëvizjes Vetëvendosje, Albin Kurti, kërkoi kohë shtesë për arritjen e një marrëveshjeje politike. Afati ligjor për konstituimin përfundoi më 7 gusht, por pasojat juridike të mosrespektimit të tij mbeten të paqarta.