Asociacioni i Gazetarëve të Kosovës (AGK) ka shprehur mbështetje të plotë për protestën e paralajmëruar nga tri sindikatat e Radio Televizionit të Kosovës, pas vonesës së pagave për 700 punonjësit e këtij transmetuesi publik. Sindikata e Pavarur e RTK-së, Sindikata e Punëtorëve të RTK-së dhe Shoqata Sindikale e Radio Kosovës kanë paralajmëruar protestë për të martën, ku AGK-ja do t’i bashkohet në shenjë solidariteti. AGK-ja kërkon nga Bordi dhe Menaxhmenti i RTK-së gjetjen e një zgjidhjeje urgjente për procesimin e pagave dhe i bën thirrje Qeverisë së Kosovës të rrisë buxhetin për RTK-në, duke ndihmuar në tejkalimin e krizës financiare. Po ashtu, AGK-ja kërkon që të ndalen ndërhyrjet dhe presionet ndaj pavarësisë editoriale të RTK-së dhe avokon për një ambient pune dinjitoz për të gjithë punonjësit.