Dhomat e Specializuara të Kosovës kanë reaguar duke i cilësuar si të pasakta disa nga interpretimet e raportit të Komitetit të të Drejtave të Njeriut të Dhomës së Avokatëve të Anglisë dhe Uellsit, i cili u përgatit me kërkesë të Avokatit të Popullit të Kosovës. Në reagim theksohet se raporti nuk konstaton shkelje të të drejtave të njeriut nga gjyqtarët e Speciales dhe nuk evidenton devijime nga mandati apo shkelje të konventave ndërkombëtare në vendimet për paraburgimin e të akuzuarve. Specialja vlerëson se disa nga shqetësimet e ngritura janë përsëritje e argumenteve të mbrojtjes, ndërsa raporti nuk pasqyron në mënyrë të barabartë kundërargumentet e Prokurorisë dhe përfaqësuesve të viktimave. Ky reagim vjen pas prezantimit të raportit preliminar nga Avokati i Popullit, i cili kishte theksuar shqetësime serioze për funksionimin e Dhomave të Specializuara dhe devijim të mandatit fillestar.