Presidentja e Dhomave të Specializuara në Hagë, Ekaterina Trendafilova, ka konfirmuar pranimin e Rezolutës Nr.10-R-101, e miratuar më 12 shkurt 2026 nga Kuvendi i Kosovës, e cila kërkon respektimin e standardeve ndërkombëtare për një proces gjyqësor të drejtë. Në një letër drejtuar Kuvendit dhe kryetares Albulena Haxhiu, Trendafilova thekson se korniza ligjore e Dhomave të Specializuara përfshin garanci të forta për pavarësinë e gjyqësorit dhe respektimin e të drejtave të njeriut sipas Kushtetutës së Kosovës dhe jurisprudencës së Gjykatës Evropiane për të Drejtat e Njeriut. Rezoluta, e përgatitur nga ekspertë dhe mbështetur nga Partia Demokratike e Kosovës, kërkon nga Dhomat dhe Zyra e Prokurorit të Specializuar që të zbatojnë me përpikëri standardet kushtetuese dhe ndërkombëtare, duke theksuar rëndësinë e transparencës, llogaridhënies dhe besimit të publikut në drejtësi. Gjithashtu, në letrën e Trendafilovës përshëndetet zgjedhja e Albulena Haxhiut si kryetare e Kuvendit dhe i uroj suksese në detyrën e saj, duke vënë në dukje rëndësinë e këtij posti në kuadër të rendit kushtetues të Kosovës.