Ministrja e Jashtme e Shqipërisë, Elisa Spiropali, pas takimit me kryeministrin e Kosovës, Albin Kurti, njoftoi se hapi i radhës do të jetë mbledhja e përbashkët e qeverive të dy vendeve, me fokus projekte konkrete dhe afate të qarta. Në këtë takim u diskutuan iniciativa transformuese si hekurudha "kuq e zi", korridoret energjetike, si dhe thellimi i bashkëpunimit në fusha të ndryshme si arsimi, kultura, siguria dhe diplomacia. Spiropali përgëzoi Kurtin për rezultatin zgjedhor dhe konstituimin e institucioneve të reja, duke theksuar rëndësinë e stabilitetit institucional në një kohë pasigurie rajonale dhe evropiane. Ajo u zotua se Shqipëria do të qëndrojë pranë Kosovës jo vetëm me solidaritet, por edhe me angazhim të përditshëm dhe vizion afatgjatë, duke theksuar se zëri i përbashkët është më i fortë.