Ministrja për Evropën dhe Punët e Jashtme e Shqipërisë, Elisa Spiropali, theksoi se dialogu mes Kosovës dhe Serbisë mbetet rruga e vetme për një zgjidhje të qëndrueshme dhe stabilitet afatgjatë në rajon, por kjo nuk mund të ndodhë pa njohje reciproke dhe pranimin e realitetit të pavarësisë së Kosovës nga Serbia. Ajo nënvizoi se Serbia duhet të pajtohet me këtë realitet jo si akt presioni, por si hap i domosdoshëm për normalizimin e marrëdhënieve dhe integrimin e Kosovës në organizatat ndërkombëtare. Spiropali e konsideron vitin 2026 si një moment kyç për konsolidimin ndërkombëtar të Kosovës dhe për mbylljen përfundimtare të çdo paqartësie historike për vendin e saj në Evropë. Shqipëria do të vazhdojë ta mbështesë fuqishëm Kosovën në këtë rrugë, duke e cilësuar Kosovën si prioritet strategjik të politikës së saj të jashtme dhe duke kërkuar që Bashkimi Evropian të njohë Kosovën si vend kandidat pa standarde të dyfishta.