Ministrja e Mjedisit dhe Planifikimit Hapësinor, Fitore Pacolli, ka dënuar me forcë sulmin ndaj shtëpisë së familjes Berisha në Zveçan, duke e cilësuar atë si një akt barbar dhe të papranueshëm që synon të krijojë frikë dhe pasiguri te familjet shqiptare që po rikthehen në pronat e tyre. Ajo theksoi se familja Berisha është përfituesja e një projekti qeveritar për rindërtimin dhe renovimin e shtëpive, dhe se këto sulme nuk do të ndalin as kthimin e familjeve dhe as zbatimin e këtij programi në të gjithë Kosovën. Ministrja Pacolli kërkoi nga organet kompetente që të zbardhin rastin sa më shpejt dhe të sjellin para drejtësisë autorët e sulmit, duke theksuar se qëllimi i këtyre veprimeve është pengimi i politikave shtetërore që garantojnë të drejtën e qytetarëve për t’u kthyer në pronat e tyre. Ajo siguroi se Ministria do të vazhdojë me përkushtim realizimin e këtij programi, pavarësisht nga kërcënimet dhe sulmet e tilla.