Ministri i Punëve të Brendshme të Kosovës, Xhelal Sveçla, mori pjesë në Forumin e Salzburgut ku diskutoi për bashkëpunimin rajonal në menaxhimin e migracionit dhe sigurinë kufitare. Ai mirëpriti lansimin e Sistemit të Hyrje/Daljes (EES), duke e cilësuar atë një hap të rëndësishëm drejt modernizimit dhe digjitalizimit të kufijve të jashtëm të zonës Schengen. Sveçla theksoi përkushtimin e Kosovës për të avancuar bashkëpunimin me partnerët evropianë dhe EUROPOL-in, duke kontribuar si një partner i besueshëm në sigurinë rajonale dhe më gjerë. Ai gjithashtu vuri në dukje rëndësinë e informimit të qytetarëve për rregullat e udhëtimit dhe qëndrimit në zonën Schengen dhe në Kosovë, përmes fushatave informuese dhe platformave online, si dhe bashkëpunimin e ngushtë me Frontex në pika kufitare dhe në Aeroportin Ndërkombëtar të Prishtinës.