Besnik Tahiri, shefi i grupit parlamentar të Aleancës për Ardhmërinë e Kosovës, ka bërë një analizë të detajuar të strukturës së kabinetit të Qeverisë Kurti 3, duke theksuar se në këtë qeveri janë emëruar politikisht 453 persona, shifër kjo që sipas tij e bën kabinetin më të madh në rajon dhe më të madh në krahasim me popullsinë edhe se qeveritë e Kinës, Indisë dhe Pakistanit. Ai kritikoi krijimin e ministrive pa portofol real, që sipas tij shërbejnë vetëm për të rritur numrin e emërimeve politike dhe për të akomoduar interesat partiake. Tahiri prezantoi strukturën e kabinetit, ku kryeministri ka deri në 49 këshilltarë dhe staf, zëvendëskryeministrat deri në 22, ministrat deri në 14 këshilltarë dhe staf, ndërsa zëvendësministrat kanë deri në dy apo tre persona në staf. Ai theksoi se kjo madhësi e kabinetit është e papërballueshme për nevojat reale të Kosovës, sidomos në një kohë kur qytetarët përballen me krizë ekonomike dhe mungesë perspektive, ndërsa qeveria nuk ka prezantuar ende një program të qartë veprimi. Tahiri e konsideron këtë situatë si një akomodim të tepruar politik në qeveri, duke kritikuar mungesën e fokusit në problemet reale të vendit.