Deputeti i Aleancës për Ardhmërinë e Kosovës, Besnik Tahiri, ka shprehur shqetësime serioze lidhur me projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme. Ai ka kritikuar mungesën e konsultimit publik gjatë hartimit të ligjit, duke e cilësuar këtë si shkelje procedurale dhe mungesë transparence. Tahiri gjithashtu ka kundërshtuar kompetencat që i jepen Byrosë dhe drejtorit të saj për rregullimin e procedurave përmes akteve nënligjore, duke theksuar se kjo bie ndesh me vendimet e Gjykatës Kushtetuese. Një tjetër shqetësim i tij është parashikimi i retroaktivitetit në ligj, i cili cenon sigurinë juridike. Ai ka theksuar se Byroja nuk duhet të shndërrohet në një “tigër prej letre” apo instrument politik, por duhet të jetë një institucion funksional në shërbim të drejtësisë dhe qytetarëve, duke theksuar se institucionet duhet të jenë të pavarura nga partitë politike.