Ministri për Evropën dhe Punët e Jashtme i Shqipërisë, Ferit Hoxha, zhvilloi një takim me homologun ukrainas, Andrii Sybiha, ku diskutuan zhvillimet e fundit në Ukrainë, sigurinë evropiane dhe bashkëpunimin mes dy vendeve. Gjatë bisedës u theksua përkushtimi i Shqipërisë për të mbështetur Ukrainën në përpjekjet për t’i dhënë fund luftës së nisur nga agresioni rus dhe rëndësia e ruajtjes së ritmit në procesin e anëtarësimit në Bashkimin Evropian. Ministri Hoxha njoftoi gjithashtu se në muajin qershor Tirana do të mirëpresë një takim ministror kushtuar Ukrainës, si një dëshmi e bashkëpunimit të ngushtë dhe angazhimit për paqe, siguri dhe stabilitet rajonal. Ky takim pritet të forcojë më tej marrëdhëniet dypalëshe dhe të adresojë sfidat e sigurisë në Evropë në një kohë të rëndësishme për rajonin.