Delegacioni i organizatës Albanians for America, i udhëhequr nga Gino Mulliqi, zhvilloi një takim me Presidentin e Shqipërisë, Bajram Begaj, ku u trajtuan çështje me interes për diasporën shqiptaro-amerikane dhe zhvillimet në rajon. Mulliqi vlerësoi vizitën historike të Presidentit në Dallas, Texas, dhe angazhimin e tij për shqiptarët e Luginës së Preshevës, duke theksuar mbështetjen e fortë ndaj komunitetit shqiptar në SHBA. Gjatë bisedimeve u diskutua rëndësia e përfshirjes së komunitetit në vendimet për projekte strategjike si ai i Zvërnecit, si dhe nevoja për të krijuar një klimë të favorshme për investimet amerikane në Shqipëri. Një pjesë e takimit iu kushtua edhe zhvillimeve në Kosovë, përfshirë mundësinë e përfshirjes së saj në projektet rajonale të energjisë dhe gazit të lëngshëm natyror, që konsiderohen hapa strategjikë për sigurinë energjetike.