Policia e Shtetit ka rrethuar me masa të shtuara sigurie godinën e Kuvendit të Shqipërisë në prag të protestës së paralajmëruar për këtë të hënë, duke bllokuar të gjitha rrugët hyrëse dhe vendosur kordone në pika kyçe si rruga e Elbasanit, pranë Galerisë së Arteve dhe Ministrisë së Brendshme. Protesta, e 58-ta radhazi, pritet të zhvillohet jo vetëm përpara Parlamentit, por edhe në disa pika strategjike të kryeqytetit, ku qytetarët do të presin mbërritjen e ministrave dhe deputetëve. Forcat policore janë të vendosura në dy rreshta dhe monitorojnë me kujdes situatën, ndërsa deri tani protesta paraqitet e qetë, por nuk përjashtohen tensione dhe përplasje si ato të datës 23 korrik. Fokus i vëmendjes mbetet mënyra se si do të menaxhohet tubimi dhe nëse do të ruhet rendi gjatë zhvillimit të seancës së fundit plenare të këtij sesioni parlamentar.