Ish-sekretari i Përgjithshëm i NATO-s, Lord George Robertson, dhe ish-inxhinieri i ushtrisë britanike Paul Foster, i kanë bërë thirrje partive politike në Kosovë që të veprojnë me përgjegjësi dhe urgjencë për të zgjidhur ngërçin institucional rreth zgjedhjes së presidentit dhe formimit të qeverisë. Ata paralajmërojnë se bllokimi i vazhdueshëm mund të dobësojë besimin e qytetarëve dhe të largojë fokusin nga çështjet kyçe si siguria, zhvillimi ekonomik dhe perspektiva evropiane e vendit. Në një kohë të pasigurisë globale dhe rajonale, Robertson dhe Foster theksojnë nevojën për një lidership politik të përgjegjshëm dhe bashkëpunues, që të përmbushë pritshmëritë e qytetarëve. Ata nënvizojnë se zgjedhja e presidentit dhe formimi i qeverisë duhet të bëhen në përputhje me Kushtetutën dhe interesin e përgjithshëm të Kosovës, duke lënë mënjanë përçarjet politike.