Kryeministri në detyrë i Kosovës, Albin Kurti, mori pjesë në prezantimin e projektit ideor për rinovimin dhe zgjerimin e Qendrës së Studentëve në Prishtinë, në kuadër të përgatitjeve për Lojërat Mesdhetare 2030. Projekti parashikon zgjerimin e kapaciteteve akomoduese në 4500 shtretër, renovimin e konvikteve ekzistuese, palestrës “1 tetori”, mensës së studentëve, si dhe ndërtimin e objekteve të reja si salla multifunksionale dhe pishina gjysmë-olimpike. Qendra do të shërbejë si “Fshati i Atletëve” gjatë Lojërave dhe më pas do të mbetet një investim afatgjatë për arsimin e lartë dhe jetesën studentore në Kosovë. Kryeministri Kurti theksoi rëndësinë e bashkëpunimit me Agjencinë Franceze për Zhvillim dhe synimin për dyfishimin e bursave për studentë, duke garantuar kushte më të mira për studim dhe banim në kampusin universitar.