Deputeti i Partisë Demokratike të Kosovës, Artan Behrami, së bashku me deputetë nga Lidhja Demokratike e Kosovës dhe Aleanca për Ardhmërinë e Kosovës, kanë kërkuar mbledhje urgjente të Komisionit për Drejtat e Njeriut, Barazi Gjinore, Punë, Familje, Vlerat e Luftës Çlirimtare dhe Peticione. Kërkesa u dorëzua te kryetarja e komisionit, Fatmire Kollçaku, dhe mbledhja është caktuar të mbahet nesër në orën 10:00. Deputetët shprehin shqetësim për tendencat e rishkrimit dhe deformimit të së vërtetës historike, të cilat sipas tyre rrezikojnë të zbehin karakterin çlirimtar të luftës së Kosovës. Ata kritikojnë ekspozitën për masakrat në Kosovë, duke e cilësuar atë si një devijim nga e vërteta historike dhe një shkak për shqetësim të thellë publik lidhur me trajtimin e ngjarjeve të luftës.