Udhëheqësit fetarë të Kosovës nga komunitete të ndryshme, përfshirë Bashkësinë Islame, Kishën Ortodokse Serbe, Kishën Katolike, Kishën Protestante Ungjillore dhe Bashkësinë Hebraike, kanë dalë me një deklaratë të përbashkët ku riafirmojnë përkushtimin e tyre për paqen, dinjitetin njerëzor dhe respektin ndërmjet të gjithë qytetarëve. Ata kanë bërë thirrje për përdorim të gjuhës së matur dhe respektuese në debatet publike, duke kërkuar ndalimin e fyerjeve, sulmeve personale dhe gjuhës së urrejtjes, veçanërisht ndaj grave dhe vajzave. Në deklaratë theksohet nevoja për refuzim të stereotipeve dhe gjuhës mizogjene, si dhe për mbrojtje të diversitetit etnik, fetar dhe social në periudhën zgjedhore. Udhëheqësit fetarë nxisin gjithashtu ndershmëri në komunikim, përgjegjësi në media dhe bashkëpunim për të ruajtur strukturën demokratike dhe shoqërore të Kosovës.