Ukë Rugova, djali i ish-presidentit Ibrahim Rugova, ka zhvilluar takime me qytetarë dhe mbështetës të Lidhjes Demokratike të Kosovës në disa fshatra të Suharekës. Një moment i veçantë i fushatës ishte vizita në odën e Bajram Sopës, një figurë e njohur e çështjes kombëtare dhe bashkëpunëtor i presidentit Rugova, i cili ka kontribuar në arsimimin e të rinjve në vitet ’90. Gjatë kësaj vizite, Ukë Rugova dhe Albena Reshitaj, kandidate për deputete nga LDK, formuan me duar simbolikisht numrin 7, që përfaqëson pozicionin e saj në listën zgjedhore. Afërsia mes tyre ka rrënjë historike, pasi Dr. Ibrahim Rugova dhe daja i Albena Reshitajt, Murat Bujupi, kanë qenë shokë shkolle dhe bashkëpunëtorë në krijimtarinë letrare disa dekada më parë.