Në 83-vjetorin e lindjes së Ukshin Hotit, kryeministri në detyrë i Kosovës, Albin Kurti, ka përkujtuar figurën e veprimtarit dhe intelektualit shqiptar duke theksuar se ideali i tij për liri nuk kufizohet nga koha apo hapësira. Kurti ka vizituar ekspozitën digjitale “DheShkronjë” në Shtëpinë Muze në Krushë të Madhe, e cila është përgatitur nga Komisioni Qeveritar për Persona të Zhdukur me mbështetjen e Muzeut Kombëtar të Kosovës. Ekspozita prezanton jetën, veprën dhe trashëgiminë e Ukshin Hotit përmes një rrëfimi bashkëkohor që lidh vendlindjen, rrugëtimin jetësor dhe angazhimin e tij politik e intelektual. Kurti ka theksuar se figura e Hotit vazhdon të jetojë përmes mendimit dhe veprës së tij, duke u bërë një simbol që shtrihet përtej kufijve fizikë dhe kohorë.