Ish-diplomati Sylë Ukshini ka akuzuar partitë opozitare për mungesë kauzash politike dhe përfshirje në lojën e kryeministrit Albin Kurti. Ai theksoi se Kurti ka ndërtuar kauza të forta si Astrit Dehari, demarkacioni dhe bashkimi kombëtar, ndërsa opozita nuk ka arritur të krijojë një narrativë të tillë dhe po humbet fokusin duke u zënë në debatet për përgjegjësitë e zgjedhjeve të reja. Ukshini vuri në dukje se kriza aktuale politike nuk është thjesht juridike apo kushtetuese, por rrjedh nga mungesa e kompromisit politik që ka nisur që nga viti 2014, kur humbësit u bashkuan për të penguar fitoret e partive të tjera. Ai gjithashtu tha se Kurti ka tentuar të afrojë opozitën, veçanërisht LDK-në, me oferta të favorshme, por ato janë refuzuar për shkak të kalkulimeve politike, ndërsa PDK-ja është më e fokusuar në çështjet e Gjykatës Speciale sesa në bashkëpunim politik.