Ministri në detyrë i Shëndetësisë, Arben Vitia, ka nënshkruar Udhëzimin Administrativ të ri për shkollimin specialistik, duke prezantuar tri politika të rëndësishme për profesionistët shëndetësorë. Ndryshimet përfshijnë uljen e tarifës për specializim nga 3000 në 500 euro për qytetarët nga të gjitha viset shqiptare, duke e barazuar me tarifën e qytetarëve të Kosovës. Për herë të parë, specializanteve në pushim të lehonisë do t’u vazhdohet pagesa pas kthimit në specializim, një masë që synon mbështetjen e grave në këtë periudhë. Gjithashtu, përvoja njëvjeçare e punës nuk do të jetë më kriter eliminues, por kriter poentues në procesin e përzgjedhjes, ndërsa shumë shpejt pritet hapja e konkursit të ri për specializantë.