Eksperti i sigurisë Hysen Gecaj ka vlerësuar se kushtet për hapjen e Urës së Ibrit për qarkullim të automjeteve janë pjekur, duke theksuar se ky hap është pjesë e procesit të bartjes së përgjegjësive nga prania ndërkombëtare te autoritetet kosovare. Ai ka nënvizuar se vendimi është marrë pas një vlerësimi të gjerë të situatës së sigurisë brenda Kosovës dhe në kontekstin ndërkombëtar, duke përfshirë edhe tensionet aktuale në rajon. Megjithatë, Gecaj paralajmëroi se rreziqet nuk janë eliminuar plotësisht, duke përmendur deklaratat e ashpra të presidentit serb Aleksandar Vuçiq dhe situatën e tensionuar në Liqenin e Ujmanit. Ai kërkoi vigjilencë të vazhdueshme nga institucionet edhe pas hapjes së urës, duke theksuar rëndësinë e vazhdimit të procesit gradual të bartjes së kompetencave te institucionet e Kosovës.