Kryeministri në detyrë, Albin Kurti, vizitoi punimet për ndërtimin e urës së re mbi lumin Ibër në Mitrovicë, e cila do të lidhë Zhabarin me Gushacin. Ky projekt infrastrukturor përfshin një urë prej 65 metrash gjatësi dhe 22.5 metrash gjerësi, me katër korsi qarkullimi dhe trotuare në të dyja anët, si dhe ndërtimin e dy rreth-rrotullimeve dhe një segmenti të ri rrugor prej 500 metrash. Ura synon të rrisë sigurinë, të përmirësojë qarkullimin e qytetarëve dhe të mundësojë akses më të shpejtë për institucionet e rendit në të dyja anët e lumit. Sipas Kurtit, puna po ecën sipas planit dhe përfundimi i projektit pritet brenda këtij viti, duke sjellë edhe zhvillim ekonomik dhe kushte më të mira për ndërlidhjen e zonave përreth.