Pjesëtarët e Forcës së Sigurisë së Kosovës kanë kryer kujdestari përveç orarit të rregullt të punës, por për këtë punë shtesë nuk janë paguar. Sipas raportit vjetor të Zyrës Kombëtare të Auditimit, Ministria e Mbrojtjes ka kërkuar nga Ministria e Financave ndarje të mjeteve shtesë për pagesën e kujdestarive, por kërkesa nuk është aprovuar. Vlera e borxhit të papaguar ndaj ushtarëve për vitin 2025 kap mbi 2 milionë euro, dhe kjo situatë rrezikon që Ministria të përballet me padi gjyqësore. Ekspertët dhe avokatët theksojnë se mos pagesa dëmton jo vetëm të ardhurat e pjesëtarëve të FSK-së, por edhe imazhin e institucionit dhe krijon kosto shtesë për buxhetin e shtetit. Ministria e Mbrojtjes ka nisur ndryshimin e rregullores për orarin e punës në FSK, por procesi nuk është përmbyllur ende. Nga ana e saj, Ministria ka premtuar se do të trajtojë me prioritet rekomandimet e ZKA-së dhe do të ndërmarrë veprime konkrete për zgjidhjen e problemit.