Forcat e Sigurisë së Kosovës, konkretisht kompanitë e Regjimentit të tretë të Forcave Tokësore, kanë zhvilluar ushtrime fushore në nivel skuadre dhe togu për të rritur gatishmërinë operacionale dhe përgatitjen profesionale të personelit. Ushtrimet me emra “Kilo Mike”, “Stuhia e Marsit 2026” dhe “Sierra 26” kanë pasur si qëllim përmirësimin e kapaciteteve në operacione të mbështetjes logjistike, zhvillimin e shkathtësive taktike individuale, testimin e gatishmërisë fizike, si dhe përmirësimin e koordinimit ndër-njerëzor. Gjithashtu, këto ushtrime kanë fokusuar operimin në kushte të vështira dhe reagimin ndaj kërcënimeve në terren kodrinoro-malor. Ato dëshmojnë përkushtimin e ushtarakëve në arritjen e standardeve të larta profesionale dhe operacionale, duke kontribuar në rritjen e kapaciteteve të përgjithshme të njësive në përmbushjen e misionit.