Ushtarët italianë dhe bullgarë të Komandës Rajonale-Perëndim të KFOR-it zhvilluan një stërvitje me qitje të vërtetë në poligonin pranë Kampit “Villaggio Italia” në Pejë. Ky ushtrim mblodhi personel nga kombësi të ndryshme dhe kishte si qëllim shkëmbimin e përvojave, praktikave më të mira dhe rritjen e ndërveprueshmërisë mes njësive pjesëmarrëse. KFOR thekson se aktivitete të tilla janë thelbësore për ruajtjen e një niveli të lartë gatishmërie operacionale dhe ndërgjegjësimit situacional, duke siguruar një mjedis të sigurt dhe të qëndrueshëm për qytetarët e Kosovës. Misioni vazhdon të zbatojë mandatin e tij bazuar në Rezolutën 1244 të OKB-së, duke punuar ngushtë me Policinë e Kosovës dhe EULEX-in për të garantuar sigurinë dhe lirinë e lëvizjes në mënyrë të paanshme.