Eugen Cakolli nga Instituti Demokraik i Kosovës ka kritikuar ashpër vendimet e marra nga Qeveria në detyrë në mbledhjen elektronike të ditës së sotme, duke i cilësuar ato jashtë çdo kontrolli institucional dhe kundërkushtetuese. Ai thekson se shumica e anëtarëve të kabinetit janë tashmë deputetë të certifikuar, çka sipas Kushtetutës dhe Ligjit për Qeverinë i ndalon ata të ushtrojnë funksione ekzekutive, duke bërë të pavlefshme çdo vendim të marrë prej tyre. Cakolli përmend edhe vendimin e Gjykatës Supreme në rastin e ish-ministrit Hekuran Murati si precedent, duke kërkuar që të gjitha aktet e nxjerra pas certifikimit të deputetëve të kontestohen urgjentisht në Gjykatë. Ai paralajmëron se vonesa në adresimin e këtyre shkeljeve po e kthen paligjshmërinë në mjet për vazhdimin e pushtetit pas përfundimit të mandatit qeveritar.