Ministrja në detyrë e Drejtësisë, Donika Gërvalla, ka prezantuar tri vendime të rëndësishme të qeverisë në detyrë që prekin Odën e Avokatëve të Kosovës. Së pari, është ndaluar ekzekutimi i Rregullores për pranimin dhe trajtimin e thirrjeve telefonike në sistemin e caktimit të avokatëve sipas detyrës zyrtare, deri në vendimin përfundimtar të gjykatës. Po ashtu, është ndaluar ekzekutimi i aktit administrativ mbi lartësinë e shpenzimeve për regjistrim të Odës së Avokatëve, gjithashtu deri në vendimin përfundimtar të gjykatës. Në të njëjtën kohë, është emëruar Komisioni për Kompensimin e Viktimave të Krimit, duke theksuar përkushtimin e institucioneve për forcimin e sundimit të ligjit, garantimin e ligjshmërisë dhe mbrojtjen e të drejtave të qytetarëve, me fokus të veçantë në qasjen e barabartë në drejtësi dhe mbështetjen për viktimat e krimit.