Pas përfundimit të procesit gjyqësor ndaj ish-krerëve të Ushtrisë Çlirimtare të Kosovës në Dhomat e Specializuara në Hagë, veteranët dhe shoqatat e dala nga lufta kanë paralajmëruar se nuk do të rrinë duarkryq ndaj padrejtësive që po u bëhen. Kryetari i OVL-UÇK-së, Hysni Gucati, akuzoi Prokurorinë për përdorimin e gënjeshtrave dhe montimeve me qëllim që UÇK-në ta paraqesin si organizatë kriminale, duke theksuar se në këtë proces po gjykohet e gjithë Ushtria Çlirimtare dhe vetë shteti i Kosovës. Ai shprehu besimin se të akuzuarit do të shpallen të pafajshëm dhe se gjykata duhet të jetë jopolitike, duke kujtuar përvojat e këqija të shqiptarëve nga gjykatat serbe dhe jugosllave. Pas protestës masive në Prishtinë më 17 shkurt në mbështetje të të akuzuarve, shoqatat e dala nga lufta do të mblidhen së shpejti për të diskutuar hapat e mëtejshëm për të kërkuar drejtësi dhe për të mbrojtur historinë dhe dinjitetin e UÇK-së dhe Kosovës.