Ministri i Shëndetësisë, Arben Vitia, ka deklaruar se Lëvizja Vetëvendosje dhe kryeministri Albin Kurti po bëjnë maksimumin për të shmangur zgjedhjet e reja, duke theksuar se ato nuk do të ndryshojnë thellë rezultatin dhe përbëjnë një humbje për qytetarët. Ai ka theksuar se deri në ditën e fundit do të vazhdojnë takimet dhe propozimet për të evituar një rrugëtim të panevojshëm zgjedhor. Në të njëjtën linjë është edhe Mimoza Kusari-Lila, ministre në kabinetin qeveritar dhe udhëheqëse e partisë ‘Alternativa’, e cila ka vënë në dukje koston e lartë që do të kishte një proces i tillë për qytetarët. Kusari-Lila gjithashtu ka kritikuar sjelljen e opozitës në Kuvend, duke thënë se mungesa e bashkëpunimit dhe mosvotimi i marrëveshjeve ndërkombëtare po ngushton hapësirën për konsensus politik.