Ministri i Shëndetësisë, Arben Vitia, ka sqaruar se mos pagesa e kujdestarive për profesionistët shëndetësorë ka ndodhur për shkak të mos miratimit në kohë të buxhetit për vitin 2026, duke theksuar se pagesat do të bëhen në mënyrë retroaktive në muajt në vijim. Ai kërkoi falje për këtë situatë dhe shpjegoi se gjatë muajve janar dhe shkurt është operuar me një të dymbëdhjetën e buxhetit të vitit të kaluar, gjë që ka penguar pagesat e plota për shtesat dhe kujdestaritë. Për pagën e 13-të të specializantëve, Vitia tha se nuk ka informacione aktualisht, por se do të japë sqarime në të ardhmen. Ai gjithashtu njoftoi se deri në korrik të këtij viti do të përfundojë përgatitja e infrastrukturës së Sistemit Informativ Shëndetësor, e cila është parakusht për funksionalizimin e Fondit për Sigurime Shëndetësore në Kosovë.