Në Ditën Ndërkombëtare kundër Torturës, Avokati i Popullit, Naim Qelaj, së bashku me drejtoreshën e Mekanizmit Kundër Torturës, Shqipe Ibraj Mala, vizituan Qendrën Edukuese Korrektuese për të Mitur në Lipjan. Gjatë takimit me ushtruesin e detyrës së drejtorit, Fitim Bërbatovci, u diskutua për kushtet e akomodimit, trajtimin e të miturve dhe sfidat e stafit në përmbushjen e detyrave të tyre. Avokati i Popullit theksoi rëndësinë e trajtimit me dinjitet dhe respekt të të miturve të privuar nga liria, duke u bazuar në standardet kombëtare dhe ndërkombëtare për të drejtat e njeriut. Shërbimi Korrektues i Kosovës riafirmoi përkushtimin për respektimin e këtyre të drejtave dhe zbatimin e standardeve më të larta në institucionet korrektuese, me fokus të veçantë tek të miturit dhe riintegrimi i tyre në shoqëri.