Presidentja e Kosovës, Vjosa Osmani, ka dekoruar figura të shquara që kanë dhënë kontribut të madh gjatë periudhës së vështirë të vendit drejt paqes dhe pavarësisë. Ajo theksoi se dekoratat janë një mirënjohje për heronjtë e Ushtrisë Çlirimtare të Kosovës, të cilët dhanë jetën për liri dhe dinjitet, si dhe për qytetarët që me dije dhe përkushtim profesional ndërtuan themelet e shtetit. Në ceremoni u nderuan edhe mjekët, gratë prijëtare, gazetarët, aktivistët dhe diaspora në SHBA, Evropë e Australi, të cilët mbajtën gjallë kauzën e lirisë dhe shtetndërtimit. Osmani theksoi rëndësinë e kontributit të të gjithë atyre që punuan për ndërtimin e institucioneve dhe konsolidimin e shtetit, duke e bërë Kosovën një vend ku secili ndihet i barabartë dhe i vlerësuar.