Presidentja e Kosovës, Vjosa Osmani, do të përfundojë mandatin e saj dhe të shtunën më 4 prill në orën 16:00 do t’ia dorëzojë detyrën kryeparlamentares Albulena Haxhiu. Ceremonia e dorëzim-pranimit do të mbahet në kabinetin e Presidencës, ku pritet të jenë të pranishëm zyrtarë institucionalë dhe bashkëpunëtorë të të dyja palëve. Ky akt shënon një moment të rëndësishëm institucional dhe vazhdimësinë e funksionimit të rregullt të institucioneve shtetërore në një periudhë kur Kuvendi i Kosovës ende nuk ka zgjedhur presidentin e ri. Për pasojë, ushtrimi i detyrës së presidentit do të kalojë përkohësisht te kryetarja e Kuvendit, sipas përcaktimeve kushtetuese, për një periudhë maksimale prej gjashtë muajsh, duke hapur kështu një fazë të përkohshme institucionale deri në zgjedhjen e kreut të ri të shtetit.