Bordi i Paqes publikoi dokumentin zyrtar ku shihet nënshkrimi i presidentes së Kosovës, Vjosa Osmani, për angazhimin e Forcës së Sigurisë së Kosovës (FSK) në Forcën Ndërkombëtare të Stabilizimit në Gaza, pjesë e planit të OKB-së dhe Trumpit për paqe. Në dokument theksohet angazhimi për paqe dhe stabilitet në rajonin e Gazës sipas Rezolutës 2803 të Këshillit të Sigurimit të Kombeve të Bashkuara. Kryeministri Albin Kurti konfirmoi se ka dhënë lejen për pjesëmarrjen e FSK-së në këtë mision, duke theksuar se Ministria e Mbrojtjes dhe komandanti i FSK-së kanë marrë autorizimin për të marrë pjesë në konferencën në Doha të Katarit lidhur me këtë forcë stabilizuese. Kurti shtoi se përveç Forcës Stabilizuese Ndërkombëtare do të ketë edhe një organizatë ndërkombëtare politike, ndërsa detajet e mëtejshme do t’i menaxhojnë Ministria e Punëve të Jashtme dhe ajo e Mbrojtjes.