Në përvjetorin e 24 marsit 1999, presidentja e Kosovës, Vjosa Osmani, ka kujtuar me nderim viktimat e kësaj dite, duke vlerësuar sakrificën dhe qëndresën e familjeve Hajrizi dhe Berisha në Mitrovicë. Ajo theksoi se kjo datë përfaqëson jo vetëm përkujtim, por edhe krenari për forcën dhe guximin e këtyre familjeve dhe qytetarëve të Mitrovicës që nuk u përkulën para regjimit serb. Në akademinë përkujtimore dhe gjatë vizitave te familjet e të rënëve, Osmani ripërtëriti zotimin se kujtimi për viktimat do të jetojë përherë në historinë dhe ndërgjegjen e shtetit të Kosovës. Ajo nderoi veçanërisht Profesor Latif Berishën, Agim Hajrizin, nënën e tij dhe Ilirin e vogël, të vrarë nga regjimi gjenocidal i Serbisë në një nga ditët më vendimtare për Kosovën.