Kryetari i komunës së Tetovës, Bilall Kasami, në kongresin e VLEN-it, foli për rrugëtimin politik të kësaj partie dhe sfidat që kanë kaluar. Ai theksoi se kur u krijua Lëvizja BESA si koalicion, shumëkush mendonte se ishte e pamundur të krijohej një alternativë reale politike shqiptare për shkak të një sistemi të mbyllur dhe pushteti të pakapshëm. Kasami nënvizoi besimin e tyre se politika nuk duhet të jetë pronë e askujt dhe se shqiptarët meritojnë më shumë se retorikë të zbrazët, duke theksuar dinjitetin e popullit që nuk duhet trajtuar vetëm si numër në ditë zgjedhjesh. Ai përmendi se kongresi i sotëm është një moment reflektimi pas shumë sprovash dhe shënon fillimin e një etape të re për VLEN-in.