Drejtori i Departamentit për NATO në Ministrinë e Punëve të Jashtme dhe Diasporës së Kosovës, Astrit Zemaj, priti në një takim lamtumire gjeneral brigadier dr. Sven Lange, drejtor i NALT në kuadër të NATO-s, me rastin e përfundimit të mandatit të tij në Kosovë. Gjatë takimit u vlerësua bashkëpunimi i ngushtë dhe i vazhdueshëm ndërmjet institucioneve të Kosovës dhe NALT, i cili ka ndihmuar në avancimin e kapaciteteve të vendit dhe në rritjen e ndërveprueshmërisë me strukturat e NATO-s. Zemaj shprehu mirënjohjen për lidershipin dhe angazhimin e gjeneral Lange, si dhe për kontributin e tij në përmbushjen e standardeve që afrojnë Kosovën me synimin strategjik të anëtarësimit në NATO. Republika e Kosovës theksoi përkushtimin e saj për të forcuar më tej bashkëpunimin me NATO-n dhe vendet aleate, duke e konsideruar këtë bashkëpunim thelbësor për sigurinë dhe integrimin e plotë në Aleancën Veri-Atlantike.