Monika Zajkova, kryetarja e PLD-së, kërkon që sistemi elektronik i votimit të përdoret jo vetëm nga qytetarët në diasporë, por edhe nga ata brenda vendit. Ajo argumenton se nëse sistemi është i sigurt për votuesit në vende si Australia, Gjermania apo Kanadaja, atëherë nuk ka arsye që të mos përdoret edhe në qytete dhe zona rurale të Maqedonisë së Veriut. Zajkova thekson se heqja e qendrave të votimit me pak votues ka detyruar njerëzit të udhëtojnë më shumë se 20 kilometra për të votuar, duke vënë në rrezik të drejtën kushtetuese të votës. Ky qëndrim vjen në një moment kur grupi i punës ka përfunduar negociatat dhe qeveria së bashku me BDI-në kanë paraqitur në Parlament ndryshimet në Kodin Zgjedhor për të zbatuar rekomandimet e OSBE/ODIHR, përfshirë edhe votimin elektronik të diasporës.