Aleanca për Shqiptarët me Ziadin Selën akuzon Qeverinë e Hristian Mickoskit për bllokimin dhe devijimin e Korridorit 8, duke zbatuar urdhërat e Presidentit të Serbisë, Aleksandër Vuçiç. Ministri i Transportit dhe Infrastrukturës së Serbisë, Goran Vesic, në një deklaratë të tetorit 2024 të transmetuar nga agjencia bullgare BGNES, e ka quajtur devijimin e Korridorit 8 një fitore të Serbisë ndaj Perëndimit dhe ka theksuar rëndësinë e Korridorit 10 për të bërë Serbinë epiqendër rajonale. Ministri i Transportit të Maqedonisë së Veriut, Aleksandër Nikollovski, sipas ASH-së, ka ridestinuar fondet ndërkombëtare nga Korridori 8 në Korridorin 10, duke përjashtuar rajone si Struga dhe duke i izoluar ato. Sipas informacioneve të siguruara nga ASH, pas izolimit të Strugës, do të ndodhë izolimi i rajoneve të Pollogut dhe Kërçovës, ndërsa prioritet do t’i jepet ndërtimit të autostradës Manastir-Ohër, duke konsoliduar më tej ndikimin serb në rajon dhe duke bllokuar lidhjen me Perëndimin.