Drejtori i Institutit për Studime të Luftës Hibride, Arben Fetoshi, ka akuzuar presidentin serb Aleksandar Vuçiq se po rikthen narrativën e ish-presidentit Sllobodan Millosheviq përmes projektit “Bota Serbe”, duke përdorur strategji hibride kundër Kosovës dhe Perëndimit. Ai thekson se Vuçiq së bashku me Millorad Dodikun, Milan Knezheviqin dhe patriarkun Porfirije po vazhdojnë politikën e Millosheviqit, duke viktimizuar serbët dhe mohuar përgjegjësinë për krimet e luftës. Gjatë ceremonisë përkujtimore të operacionit kroat “Stuhia”, Vuçiq përdori retorikë emocionale për të legjitimuar projektin dhe për të justifikuar qëllimet e tij politike, ndërsa Dodik, Knezheviq dhe Porfirije përforcuan këtë narrativë me akuza dhe mbështetje kishtare. Fetoshi paralajmëron se mohimi i krimeve dhe falsifikimi i historisë rrezikojnë të sjellin pasoja të ngjashme me ato të së kaluarës, duke theksuar se kjo strategji mund të çojë në përshkallëzim të tensioneve në rajon.