Presidenti i Serbisë, Aleksandër Vuçiq, priti në Beograd emisarin evropian për dialogun Kosovë-Serbi, Peter Sorensen, ku theksoi diskriminimin e dukshëm ndaj serbëve në Kosovë dhe pasigurinë që ata përjetojnë për shkak të zbatimit selektiv të ligjeve. Vuçiq kritikoi masat njëanshme të Prishtinës, si Ligjin për të huajt dhe atë për automjetet, të cilat sipas tij ushtrojnë presion mbi popullsinë serbe dhe institucionet e saj në Kosovë. Ai theksoi se dialogu mbetet rruga e vetme për zgjidhjen e çështjeve të hapura dhe kërkoi angazhimin konkret të Prishtinës për zbatimin e marrëveshjeve të arritura, përfshirë formimin e Asociacionit të komunave me shumicë serbe. Vuçiq gjithashtu nënvizoi rëndësinë e angazhimit të vazhdueshëm të Bashkimit Evropian për të parandaluar veprime që pengojnë dialogun dhe për të krijuar kushte për zhvillimin e tij në mënyrë të qetë dhe konstruktive.