Presidenti i Serbisë, Aleksandër Vuçiq, ka zhvilluar një takim në Beograd me përfaqësuesin special të Bashkimit Evropian për dialogun Kosovë-Serbi, Peter Sorensen, ku ka shprehur shqetësimet e tij lidhur me pranimin e Kosovës në një aleancë ushtarake rajonale me Shqipërinë dhe Kroacinë. Vuçiq theksoi se kjo aleancë rrit tensionet dhe kërcënon sigurinë e popullit serb në rajon. Gjatë bisedës u diskutua gjithashtu nevoja për hapa konkretë drejt formimit të Asociacionit të Komunave me Shumicë Serbe, si dhe ligjet e reja që Kosova do të nisë të implementojë nga 15 marsi. Presidenti serb bëri thirrje për shmangien e përshkallëzimeve dhe kërkoi nga bashkësia ndërkombëtare të marrë seriozisht çështjet që prekin komunitetin serb në Kosovë, duke kërkuar respektimin e të drejtave të tyre.