Zëvendësministri i Punëve të Jashtme dhe Diasporës, Kreshnik Ahmeti, zhvilloi takime të rëndësishme në Washington, D.C. me Senatorin Gary Peters dhe Kongresistin Ritchie Torres për të diskutuar thellimin e marrëdhënieve bilaterale ndërmjet Kosovës dhe Shteteve të Bashkuara. Gjatë këtyre takimeve u theksua rëndësia e mbështetjes së SHBA-së për njohje të reja ndërkombëtare të Kosovës dhe për avancimin e procesit të anëtarësimit të saj në NATO. Ahmeti shprehu mirënjohje për përkrahjen e vazhdueshme përmes Aktit të Autorizimit të Mbrojtjes Kombëtare (NDAA), duke vlerësuar kontributin amerikan në sigurinë dhe mbrojtjen e Kosovës. Gjithashtu, u diskutua edhe për situatën e shqiptarëve në Luginën e Preshevës dhe nevojën për përmirësimin e të drejtave dhe kushteve të tyre, duke kërkuar më shumë vëmendje ndërkombëtare ndaj kësaj çështjeje.