Afati 34 ditor i përcaktuar nga Gjykata Kushtetuese për zgjedhjen e presidentit të ri në Kosovë po afron, por deri tani nuk ka shenja për një pajtueshmëri politike mes partive kryesore. Nëse presidenti nuk zgjidhet brenda këtij afati, Kuvendi do të shpërndahet automatikisht dhe vendi do të shkojë në zgjedhje të reja parlamentare brenda 45 ditësh, që pritet të mbahen në fillim të qershorit. Avokati Ardian Bajraktari thekson se mungesa e vullnetit politik për kompromis e bën këtë skenar të pashmangshëm, ndërsa takimi i vetëm mes kryetarit të LVV-së, Albin Kurti, dhe kryetarit të LDK-së, Lumir Abdixhiku, nuk solli rezultat. Analisti Jeton Halimi sugjeron që posti i presidentit t’i jepet opozitës për të shmangur zgjedhjet, ndërsa Kurti synon të takojë edhe kryetarin e PDK-së, Bedri Hamza, i cili kërkon ftesë zyrtare për një iniciativë të tillë.