Lëvizja FOL ka shprehur shqetësim të thellë për mënyrën se si u zhvillua procesi i zgjedhjes së Presidentit të Republikës së Kosovës në Kuvend, duke e cilësuar atë si një rrezik serioz për rendin kushtetues. Sipas FOL, tentativa për të zgjedhur Presidentin përmes një procedure të kontestueshme dhe pa praninë e kuorumit të nevojshëm prej 80 deputetësh, shkel në mënyrë të qëllimshme Kushtetutën dhe krijon precedent të rrezikshëm për funksionimin e institucioneve. Lëvizja thekson se Presidenti është institucion i unitetit të popullit dhe zgjedhja e tij nuk duhet të shndërrohet në një lojë force apo kalkulim partiak, pasi kjo dobëson besimin në institucionet dhe thellon krizën institucionale. FOL i bën thirrje Kuvendit dhe deputetëve që të respektojnë plotësisht nenin 86 të Kushtetutës dhe jurisprudencën e Gjykatës Kushtetuese për të siguruar një proces të pastër dhe legjitim të zgjedhjes së Presidentit.