Komisioni Qendror i Zgjedhjeve (KQZ) në Kosovë ka deklaruar se është i gatshëm për organizimin e zgjedhjeve të reja, të cilat duhet të mbahen më së voni më 7 qershor, në rast se Kuvendi shpërndahet për shkak të moszgjedhjes së presidentit. Megjithatë, KQZ nuk ka planifikuar buxhet për këtë proces dhe do të kërkojë nga Qeveria rreth 10 milionë euro për mbulimin e shpenzimeve, pasi zgjedhjet nuk ishin parashikuar për këtë vit. Këto do të ishin zgjedhjet e pestë brenda 16 muajve, një situatë që sipas njohësve dhe sociologëve po dobëson besimin e qytetarëve në institucionet demokratike dhe rrit rrezikun e dekurajimit të votuesve.