Afati kushtetues për zgjedhjen e presidentit të ri në Kosovë po mbaron, por partitë politike nuk kanë arritur ende konsensus për një kandidat që të sigurojë shumicën prej 80 deputetësh. Në mungesë të zgjedhjes së presidentit, vendi do të përballet me zgjedhje të parakohshme parlamentare, një proces që Komisioni Qendror i Zgjedhjeve (KQZ) e konsideron sfidë të madhe, sidomos për shkak të mungesës së buxhetit të parashikuar për këtë vit. Zëdhënësi i KQZ-së, Valmir Elezi, ka theksuar se institucioni është i përgatitur të veprojë sipas mandatit kushtetues dhe ligjor, duke hartuar një plan buxhetor që do t’i dërgohet Qeverisë për miratim në rast se zgjedhjet e parakohshme bëhen realitet. Kostoja e organizimit të zgjedhjeve të fundit parlamentare ishte rreth 7 milionë euro, ndërsa buxheti i planifikuar ishte 11.5 milionë euro, dhe pritet që edhe zgjedhjet e reja të kërkojnë një planifikim të kujdesshëm financiar dhe organizativ.