Kryetari i Kuvendit të Maqedonisë së Veriut, Afrim Gashi, theksoi rëndësinë e zgjerimit të Bashkimit Evropian si një politikë kyçe për stabilitetin, sigurinë dhe prosperitetin afatgjatë të kontinentit. Ai nënvizoi se vendet e Ballkanit Perëndimor i përkasin natyrshëm BE-së, jo vetëm gjeografikisht, por edhe për shkak të vlerave dhe historisë së përbashkët. Bashkëpunimi rajonal dhe ndërlidhja infrastrukturore janë thelbësore për përshpejtimin e integrimit evropian dhe për të siguruar qëndrueshmëri ekonomike në një kohë sfidash gjeopolitike dhe ndryshimesh në zinxhirët globalë të furnizimit. Maqedonia e Veriut, me pozitën e saj strategjike, do të vazhdojë të promovojë projekte infrastrukturore dhe bashkëpunim rajonal për të kontribuar në një Evropë më të sigurt dhe ekonomikisht të ndërlidhur.