Ministri në detyrë i Infrastrukturës, Dimal Basha, ka njoftuar nisjen e punimeve për zgjidhjen e problemit të grumbullimit të ujërave në nënkalimin e Mazgitit. Qëllimi është eliminimi i shkakut kryesor të këtij problemi dhe jo vetëm sanimi i dëmeve të rrugës. Në vendngjarje është angazhuar edhe Kompania Rajonale e Ujësjellësit “Prishtina”, e cila ka ndihmuar në pastrimin e kanaleve, ku është konstatuar se kanali atmosferik nuk ishte i lidhur me kolektorin. Operatorit ekonomik i ngarkuar me sanimin e rrugës i është dhënë urdhëri për të kryer lidhjen e kanalit me kolektorin para asfaltimit, ndërsa Ministria e Infrastrukturës po punon në koordinim me institucionet për zgjidhje afatgjata dhe parandalimin e problemeve të ngjashme në të ardhmen.